काठमाण्डौ/ सडक डिभिजन कार्यालय काठमाण्डौले काठमाण्डौ महानगरपालिकाका मेयर बालेन्द्र साह (बालेन)लाई अराजक गतिबिधि नगर्न चेतावनी दिएको छ। महानगरपालिकाले
महानगरपालिकाका मेयर बालेनले शनिबार साँझ ‘एक ट्रक धुलो उपहार’ भन्दै सडक डिभिजन कार्यालय काठमाडौँ अघि धुलो खन्याएका थिए। मेयर साहले बिगत १५ वर्षदेखि काठमाण्डौबासीले कलङ्कीदेखि महाराजगञ्जसम्म रिङ रोड बिस्तारको नाममा धेरै धुलो र कष्ट बेहोर्नु परेको भन्दै काठमाडौँ महानगरले अकारण गाली खानु परेको सामाजिक सञ्जालमार्फत बताएका थिए।
बालेनको सो एक्सनप्रति डिभिजन कार्यालयले भने साहले विषयान्तर गर्न यस्तो कदम चालेको आरोप लगाएको छ। सडक डिभिजन कार्यालय काठमाण्डौले शनिबार बिहान न्यूरोडस्थित जुद्ध शालिकदेखि इन्द्रचोकसम्मको सडक खण्डमा खण्डमा सडक डिभिजनको अनुमति बिना सडकको विद्यमान क्यारिजवे घटाउने उद्देश्य अनुरूप सडकको दुवैतर्फ पिच कटर प्रयोग गरी कटिङ गरिरहेको भन्दै सो काम रोक्न लगाएको थियो।
डिभिजनले मेसिन नियन्त्रणमा लिएर राखेको थियो। सो कार्य काठमाडौँ महानगरपालिकाको कार्यालय अन्तर्गत कार्य भईरहेको जानकारीमा आएपछि आइन्दा अनुमति बिना कार्य नगर्ने सर्तमा मेसिन फिर्ता बुझाइएको थियो। सडकले बालेनले सोही विषयलाई विषयान्तर गरेर डिभिजनसँग सरकार नै नभएको विषयलाई कारण बनाई कानुनी राज्य उपहास गरेको दाबि गरेको छ ।
![](/uploads/advertise/jeniksh_1697522121.gif)
सडक डिभिजनले भनेको छ ‘मिति २०८१जेष्ठ १२ गते शनिवार करिब १२बजे न्यूरोड क्षेत्रमा यस डिभिजनको जिम्मामा रहेको सडकमा बिना अनुमति सडक काटि सडकको चौडाइ घटाउने कार्यमा महानगरपालिका लागेको बखत बिना अनुमति सडक काटेर साँघुरो बनाउन नहुने भनी सडक डिभिजनबाट सो कार्यमा रोक लगाइएको विषयलाई विषयान्तर गरी डिभिजनसँग सरोकार नभएको विषयलाई कारण बनाई गरिएको यस किसिमको व्यवहारले कानुनी राज्यको उपहास गरेको ठम्याई यस सडक डिभिजनको रहेको छ।’
डिभिजन कार्यालयले डिभिजन काठमाडौँले मिनभवन स्थित कार्यालयको गेटमा महानगरपालिकाको मिनी टिप्परबाट कार्यालय परिसर छिर्न समेत अवरोध हुने गरी फोहोर फालिएको विषयमा गम्भिर ध्यानाकर्षण भएको जनाएको छ।
डिभिजनको गेटमा देशकै ठुलो तथा जिम्मेवार स्थानीय सरकारबाट कानुनी राज्यको उपहास हुने गरी बलमिच्याई तथा अराजक शैलीबाट भएको यस किसिमको व्यवहारले महानगरको गरिमा कदापि नबढ्ने डिभिजनको भनाई छ।
डिभिजनका अनुसार शुक्रवार मात्र काठमाण्डौ महानगरपालिकाका मेयर तथा यस डिभिजनका डिभिजन प्रमुख बीच महानगर भित्रका सडक सुधारका विविध विषयमा छलफल भई नियम बमोजिम सहकार्य गरेर अगाडि जाने तथा साझा धारणा बनाई महानगर भित्रका सडक सुन्दर तथा व्यवस्थित बनाउने विषयमा छलफल भएको थियो। साथै यसअघि महानगरपालिकाबाट नियमबमोजिम यस डिभिजनमा सडक काट्न माग भई आएका सबै अनुमति दिइएको समेत जानकारी गराएको छ।
आफ्नो कार्य क्षेत्र भित्र भएका त्रुटि औँल्याई आवश्यक सुझाव दिए डिभिजन सकारात्मक सुझाव सम्झेर कार्यान्वयन गर्ने तर डिभिजनको कार्यक्षेत्रसँग सरोकार नभएको विषय उठाएर यस किसिमका अराजक व्यवहार देखाए आगामी दिनमा किमार्थ सह्य नहुने सडक डिभिजन काठमाडौँले स्पष्ट पारेको छ। यसको प्रतिकार गर्न समेत सडक डिभिजन काठमाडौँ बाध्य हुने विज्ञप्तिमा उल्लेख छ।
–न्युज कारखाना