सुनसरी / वराहक्षेत्र नगरपालिकामा सम्पन्न दोस्रो संस्करणको वराहक्षेत्र मेयर लिग कप रनिङ शिल्ड फुटबल प्रतियोगिताको उपाधि वडा नं १ ले हात पारेको छ । शुक्रवार सम्पन्न फाइनल खेलमा वडा नं ५ लाई शुन्यका विरुद्ध दुई गोलको अन्तरले पराजित गर्दै उपाधि चुमेको हो।
विजेता बनेसँगै वडा नं १ ले दुई लाख २ हजार नगद पुरस्कार प्राप्त गरेको छ । रनिङ्ग शिल्ड प्रतियोगिता भएकाले वडा नं १ ले अर्को सिजनको लिग हुनु भन्दा एक महिनासम्मको लागि एक केजीको चाँदीको सुन्दर ट्रफी समेत प्राप्त गरेको छ ।उक्त ट्रफी ३ पटक विजेता भएपछि मात्र विजेता टिमको स्वामित्वमा हुनेछ । त्यस्तै उपविजेता बनेको वडा नं ५ ले एक लाख एक हजार प्राप्त गरेको छ।
तेस्रो बनेको वडा नं ३ ले ५१ हजार र चौथौँ बनेको वडा नं ७ ले २५ हजार प्राप्त गरेका छन् । विजेता टिमलाई नगर प्रमुख रमेश कार्की, उप-प्रमुख नन्दकुमारी सुनुवार, प्रमुख प्रशासकीय अधिकृत देवेन्द्रबहादुर मल्ल लगायत वडाध्यक्षहरू, जनप्रतिनिधि, राजनीति दलका प्रतिनिधिहरूले पुरस्कार रकम, ट्रफी, मेडल र प्रमाण पत्र हस्तान्तरण गरेका थिए ।
वराहक्षेत्र ७ देविघाट स्थित वसन्तऋतृ माध्यमिक विद्यालयको खेलमैदानमा सम्पन्न प्रतियोगितामा सर्बोत्कृट खेलाडी वडा नं १ दिवस लिम्बु घोषित भए , उनले २१ हजार सहित ट्रफी प्राप्त गरेका थिए ।
फाइनल खेलको म्यान अफ द म्याच वडा नं १ का अभिषेक श्रेष्ठ घोषित भए । उनले नगर २ हजार १ सय सहित ट्रफी प्राप्त गरेका थिए ।
