काठमाडौं । नेकपा एमालेका अध्यक्ष केपी शर्मा ओलीले गौतमबुद्धको अस्तुमाथि पनि भ्रष्टाचार गर्न खोजिएको आरोप लगाएका छन् । पार्टी संसदीय दलको बैठकलाई शनिबार काठमाडौंमा सम्बोधन गर्दै ओलीले बुद्धको अस्तु समाधिस्थ गरिएको रामग्रामको स्तुपा क्षेत्र उत्खनन गर्न दिने निर्णय प्रधानमन्त्री पुष्पकमल दाहाल ‘प्रचण्ड’ ले आफ्नो योजना अनुसार गरेको समेत बताए ।
‘सम्राट अशोकले २३ सय वर्षअघि पनि नखोलेको रामग्रामको स्तुपा अहिले प्रधानमन्त्रीले सेटिङमा खोल्ने ठेक्का लगाउनु भयो,’ ओलीले भने, ‘घरबेटीको छोराको नाममा कम्पनी खोलेर एउटा एउटा इँटाको महत्व भएको ठाउँलाई अहिले ठेक्कामा दिने काम भइरहेको छ’ उनले भने ।
‘त्यो खोल्ने कार्य देश विकासको लागि होइन, देशको समृद्धिको लागि होइन, आफ्नो विकास र समृद्धिको लागि पहिलेदेखि नै योजना बनाएको थियो, त्यही अनुसार काम गरिंदैछ,’ ओलीले भने । ओलीले सो स्तुपा क्षेत्र डोजर वा गैँची लगाएर नभई युनेस्कोको उपस्थितिमा साना ब्रस लगाएर संरचना नभत्किने गरी उत्खनन गर्नुपर्नेमा सरकारले मनलाग्दी गर्न खोजेकोसमेत बताएका छन् ।
बैङ्कको लकरमा राखिएको सम्पत्तिमा बुलेट भेटिने ल्यारक्याल लामालाई लुम्बिनी विकास कोषको उपाध्यक्ष बनाउनुको रहस्य अहिले खुलेको ओलीको भनाइ छ । लामालाई लुम्बिनीको विकास गर्न होइन, रामग्रामबाट विकास आफूतर्फ सोझ्याउन उपाध्यक्ष बनाउने काम भएको उनको भनाइ छ । ओलीले पुरातत्व विभागलाई पनि लटरपटर गरेर जागिर खाने काम नगर्न चेतावनी दिए ।
