बर्दिया । प्रहरीले स्रोत नखुलेको ३० तोला सुनसहित दुई जनालाई पक्राउ गरेको छ । शनिबार पक्राउ गरिएका दुई जनासहित सुन र प्रयोग गरिएको सवारी साधन आइतबार प्रहरीले सार्वजनिक गरेको छ ।
पक्राउ पर्नेमा बाँके नेपालगञ्ज उपमहानगरपालिका–१९ राझाका २९ वर्षीय मोहन विक र कार चालक बाँके राप्ती सोनारी गाउँपालिका–२ स्थायी घर भई डुडुवा गाउँपालिका–५ जब्दहवाका ३८ वर्षीय देवेन्द्रबहादुर घर्ती रहेको प्रहरी उपरीक्षक सुधीरराज शाहीले जनाए । उनीहरुलाई सुनका गरगहनासहित प्रदेश ३–०१–०२३–८१६८ नम्बरको हुण्डाई कारसहित पक्राउ गरिएको छ ।
ईलाका प्रहरी कार्यालय बगनाहा, मोतीपुर र कतरनियाको संयुक्त टोलीले पूर्वपश्चिम राजमार्गमा जाँच गर्दा गरगहना बरामद गरिएको प्रहरी उपरीक्षक शाहीले जनाए । प्रहरीले आवश्यक कारबाहीका लागि भन्सार कार्यालय, राजापुरमा पक्राउ परेका मानिससहित गरगहना र कार बुझाएको जनाएको छ ।
