नयाँदिल्ली / भारतमा कोरोना भाइरसबाट ३० जना संक्रमित भएका छन्। भाइरसबाट संक्रमित सबैभन्दा पछिल्लो व्यक्ति उत्तर प्रदेशको गाजियावादमा भेटिएको अधिकारीहरूले पुष्टि गरेका छन्।
यसअघि बिहीबार संघीय स्वास्थ्यमन्त्री डा. हर्षवर्धनले यही मार्च ४ देखि अहिलेसम्म २९ जना संक्रमित भएको बताएका थिए। उनले आफू र आफ्नो टोलीले कोरोना भाइरस फैलिएको अवस्थाको अनुगमन र मूल्यांकन गर्दै समीक्षा र विश्लेषण गरिरहेको पनि जानकारी दिए।
कोरोनाको संक्रमण देशभित्र प्रवेश गर्न नदिन सरकारका तर्फबाट गत जनवरी १७ देखि नै विभिन्न प्रयास गरिएको मन्त्रीले बताए। विश्व स्वास्थ्य संगठनको सुझाव र आग्रह अगाडि नै आफूहरूले सावधानीस्वरूप काम थालिसकेको उनले दाबी गरे।
उनले सरकारका तर्फबाट गम्भीरतापूर्वक काम भइरहेको पनि बताए। उत्तर प्रदेश, बिहार, पश्चिम बंगाललगायतका नाकामा विशेष टोलीद्वारा अनुगमन नियन्त्रण र व्यवस्थापनको काम गरिएको छ।
