दमक, माघ १६
डेढ खरब रुपैयाँभन्दा बढीको बजेट बराबरको सरकारी भौतिक संरचना तोडफोड गराउने अदृश्य योजनाकारलाई भोट हाल्न नहुने नेकपा (एमाले) का केन्द्रीय सदस्य तथा पूर्व मन्त्री देवेन्द्र दाहालले बताएका छन्।
एमाले मनकामना टोल कमिटी, दमक–८ ले आज आयोजना गरेको टोल भेलालाई सम्बोधन गर्दै दाहालले गत भदौ २३ र २४ गते जेनजी तोडफोड गर्न बन्द कोठामा बसेर उक्साउने नेता बालेन शाहलाई भोट दिन नहुने बताएका हुन्।
मनकामना टोल कमिटीका अध्यक्ष पोष्टनाथ निरौलाको अध्यक्षतामा सम्पन्न भेलामा दाहालले राजनीतिक दर्शनविहीन उम्मेदवारबाट मुलुकको विकास सम्भव नहुने बताए। मुलुकलाई ध्वस्त पार्ने प्रवृत्तिविरुद्ध सचेत हुन उनले आग्रह गरे।
टोल भेलामा सहभागी अगुवा कार्यकर्ता, शुभेच्छुक तथा शुभचिन्तकहरूले उठाएका प्रश्नको जवाफ दिँदै दाहालले सूर्य चिन्हमा मतदान गरी एमालेलाई नजिताएसम्म देश, क्षेत्र, वडा र टोलको विकास अधुरो रहने धारणा व्यक्त गरे।
भेलामा सहभागी चन्द्रकला मिश्रले दमक–८ मा धनीपुर्जा वितरणको काम किन नभएको भन्ने प्रश्न राखेकी थिइन्। सो प्रश्नको जवाफ दिँदै दाहालले एमाले र कांग्रेस सरकारको पालामा धनीपुर्जा वितरणको तयारी भइरहेको बेला जेनजी दुर्घटनापछि जेनजी सरकारका प्रधानमन्त्री सुशिला कार्कीको नेतृत्वमा भूमि आयोग खारेज गरिएको बताए।
त्यसपछि सर्वोच्च अदालतलाई गुहारेपछि भूमि आयोग पुनःस्थापना भए पनि हाल आयोगलाई काम गर्न आवश्यक कर्मचारी नपठाइ सरकार नै बाधक बनेको दाहालको भनाइ थियो। उनी झापा क्षेत्र नं. ५ का निर्वाचन परिचालन समितिका संयोजक समेत हुन्।
भेलामा सहभागी सुरेन्द्र मल्लिकले रोजगारीको समस्या, खिन माया खरेलले विद्युत् समस्या, तथा देवी बहादुर दर्नाललगायतले बाँसको पोल प्रयोग गरी बत्ती बाल्नुपरेको समस्याबारे ध्यानाकर्षण गराएका थिए।
आगामी फागुन २१ गते हुने प्रतिनिधि सभा सदस्य निर्वाचनका लागि परिचालन समिति दमक–८ का संयोजक तथा दमक–८ का वडा अध्यक्ष धर्म प्रसाद दाहाल (दिपेश) ले केपी ओली सरकारले दिएको बजेट जेनजी सरकारले दमक–८ नम्बर वडाका धेरै योजना तथा कार्यक्रम काटिदिएको बताए। उनले सीमित बजेटमा वडावासीका समस्या समाधान गर्न आफूहरू लागिपरेको जानकारी दिए।
कार्यक्रममा एमाले झापा जिल्ला सदस्य, प्रेस चौतारी इन्चार्ज तथा मनकामना टोल निर्वाचन परिचालन समितिका संयोजक मन कुमार गदालले भेलाको आवश्यकता र औचित्यमाथि प्रकाश पारेका थिए। उक्त जानकारी एमाले मनकामना टोल कमिटीले जनाएको छ।
