दमक, माघ १७
नेकपा (एमाले) का केन्द्रीय सदस्य गोविन्द थापाले आगामी फागुन २१ गते हुने निर्वाचनमा देश जोगाउने राजनीतिक शक्तिलाई जिताउन कार्यकर्तालाई निर्देशन दिएका छन्।
नेपाल कम्युनिष्ट पार्टी (एमाले) पशुपति टोल कमिटी, दमक–८ ले आयोजना गरेको टोल भेलालाई सम्बोधन गर्दै थापाले अहिलेको निर्वाचन मुलुक जोगाउने र मुलुकलाई जलाउने शक्तिबीचको भिडन्त भएको बताएका हुन्। उनले यसपटक विगतको भन्दा बढी मिहिनेतका साथ देश जोगाउने दललाई जिताउन कार्यकर्तालाई आग्रह गरे।
पशुपति टोल कमिटी, दमक–८ का अध्यक्ष सूर्य प्रसाद भेटवालको अध्यक्षतामा सम्पन्न भेलामा वडा कमिटी दमक–८ का संयोजक समेत रहेका थापाले आफ्नै इच्छाले नभई विदेशीको इसारामा बालेन शाह झापा क्षेत्र नं. ५ बाट निर्वाचन लड्न आएको आरोप लगाए।
टोल भेलामा सहभागी अगुवा कार्यकर्ताबीच छलफल गर्दै थापाले मुलुकलाई विदेशी दलालको पञ्जाबाट जोगाउन प्रतिनिधि केपी शर्मा ओलीलाई झापा निर्वाचन क्षेत्र नं. ५ का कार्यकर्ताले उम्मेदवार बनाएको उल्लेख गरे। उनले अघिल्ला निर्वाचनमा भन्दा दोब्बर मिहिनेतका साथ गाउँ–गाउँमा खटिन कार्यकर्तालाई आग्रह गरे।
थापाका अनुसार गत भदौ २३ गते जेनजी तोडफोडमा बन्द कोठामा बसेर कलिला स्कुले युवालाई तोडफोडमा उक्साउने व्यक्ति बालेन शाह नै हुन्। साथै भदौ २४ गते विदेशी तत्वले मुलुकभर सरकारी संरचना, व्यक्ति तथा नेताहरूका घर छानी–छानी म्याप हेरेर ध्वस्त पारेको घटनाबारे गाउँ–टोलका बासिन्दालाई बुझाउन पनि उनले अनुरोध गरे।
जनताका प्रतिनिधिले सार्वजनिक बहसमा भाग नलिई आरोप–प्रत्यारोप गर्दै पन्छिएको कुराले पनि बालेन शाहको हैसियत प्रस्ट भएको थापाको भनाइ थियो।
एमाले दमक–८ को निर्वाचन परिचालन समितिका संयोजक तथा दमक–८ का वडा अध्यक्ष **धर्मप्रसाद दाहाल (दिपेश)**ले वडाको वस्तुस्थितिबारे जानकारी गराएका थिए।
कार्यक्रमको औचित्यमाथि एमाले कोशी प्रदेश निर्वाचन विभाग सदस्य प्रेम दंगालले प्रकाश पारेका थिए। उक्त जानकारी एमाले दमक–८ कमिटीका सचिव प्रकाश रिजालले दिएका हुन्।
भेलामा सहभागीहरू इन्दु न्यौपाने, विपसना दाहाल, प्रेम खड्का, ज्ञानु पोखरेल, सुरेश पौडेल र तिर्थ मिश्रलगायतले सार्वजनिक सरोकारका विषयमा प्रश्न राखेका थिए।
