मकवानपुर, माघ १८ ।
नेकपा एमालेका नेता गोकुल बास्काटाले मकवानपुर क्षेत्र नं. २ बाट एमाले उम्मेदवार महेश बर्तौलाले सानदार जित हासिल गर्नुहुने विश्वास व्यक्त गर्नुभएको छ। चुनाव प्रचार अभियानका क्रममा मकवानपुर पुग्नुभएका नेता बास्काटाले थाहानगरतर्फ जाने क्रममा आफ्नो धारणा सार्वजनिक गर्नुभएको हो।
उहाँले सामाजिक सञ्जालमार्फत आफ्नो यात्रा अनुभव सुनाउँदै राजनीति र प्रकृतिबीचको दृष्टिभ्रमलाई रोचक ढंगले प्रस्तुत गर्नुभएको छ।
उहाँले लेख्नुभएको छ, ‘अग्लो ठाउँबाट परको हिमाल आफुभन्दा होचो र धुम्मैलो देखिन्छ, अझ तलको थानकोट चन्द्रमाको क्रेटरजस्तै लाग्छ।’
उहाँले मानिसहरूलाई समेत टाढाबाट हेर्दा कमिलाजस्तै देखिने अनुभूति भएको उल्लेख गर्दै राजनीति र प्रकृतिको मिश्रित दृष्टिभ्रमको मज्जा फरक हुने बताउनुभएको छ। यस्ता अनुभूतिको बीचमा पनि नेता बास्काटाले मकवानपुर–२ मा एमाले उम्मेदवार महेश बर्तौलाको जित सुनिश्चित रहेको दाबी गर्नुभएको छ।
‘तर महेश सानदार जित्नुहुन्छ,’ उहाँले स्पष्ट रूपमा उल्लेख गर्नुभएको छ।
नेता बास्काटाको यो अभिव्यक्तिलाई नेकपा एमालेले चुनावी माहोलमा उत्साहजनक सन्देशका रूपमा लिएको छ।
