काठमाण्डौ / एन्फाले सहिद स्मारक ‘ए’ डिभिजन लिगका दर्शकलाई आकर्षित गर्न पुरस्कार प्याकेज घोषणा गरेको छ। लिगको दुई चरण सकिँदासम्म दशरथ रंगशालामा दर्शक उपस्थिति न्यून भएपछि एन्फाले मंगलबार पुरस्कार प्याकेज सार्वजनिक गरेको हो।
प्याकेजमा हरेक चरणको खेल सकिएपछि पाइने पुरस्कार र लिग सकिएपछि पाइने पुरस्कार छ। प्रतियोगिता सकिएपछि पाइने पुरस्कारमा राष्ट्रिय फुटबल टोलीसँग विदेश भ्रमण गर्ने मौका छ।
साधारण प्यारापिटको २ सय रुपैयाँको टिकट किन्ने र भीआईपी प्यारापिटको ५ सय रुपैयाँको टिकट किन्ने गोलप्रथाबाट छानिएका १–१ जना दर्शकलाई त्यो अवसर प्रदान गरिने एन्फाका उपाध्यक्ष वीरबहादुर खड्काले बताउनुभयो। हरेक चरण सकिएपछि दिइने पुरस्कारमा २ सय टिकटवाला २० र ५ सय टिकटवाला ५ दर्शकलाई आकर्षक पुरस्कार प्रदान गरिने उहाँले बताउनुभयो।
यस्तै दुवैतर्फ टिकट काट्ने गोलाप्रथाबाट छानिएका दर्शकलाई विश्वकप छनोटअन्तर्गत अस्ट्रेलिया र नेपाल, चाइनिज ताइपेई र नेपालबीच हुने खेलको भीआईपी र साधारण प्यारापिटको टिकट पनि उपलब्ध गराइने छ।
यसबाट अढाइ सय दर्शक लाभान्वित हुनेछन्। मंसिर २८ देखि सुरु भएको लिग फाल्गुन ३ सकिनेछ। लिगमा १४ वटा क्लबहरुको सहभागिता रहेको छ।
