सुनसरी/ धरान उपमहानगरपालिकाले इटहरीमा जारी स्व.गिरिजाप्रसाद कोइरालास्मृति अन्तर नगरपालिका फुटबल प्रतियोगितामा बिजयी सुरुवात गरेको छ। जिपि फाउन्डेसन प्रदेश १ खेलकुद बिभागको आयोजनामा भएको प्रतियोगिता अन्तर्गत शुक्रबारको खेलमा उर्लाबारी नगरपालिका माथी २–० को जित निकाल्दै धरान सेमिफाइनलमा प्रवेश गरेको हो।
धरानको जितमा एन्सन राई र मिलन लिम्बुले एक एक गोल गरे। राईले खेलको ५१ औ मिनेटमा गोल गरे भने लिम्बुले खेलको ८३ औ मिनेटमा गोल गरे। सो खेलको म्यानअफ द म्याच धरानका एन्सन राई घोषित भए।
भोली शनिबारको खेल सुनसरीको इनरुवा नगरपालिका र उदयपुरको चौदण्डीगढी नगरपालिका बीच हुने आयोजक समितीका अध्यक्ष सुर्य राईले जानकारी दिनुभयो।
इटहरीस्थित क्षेत्रीय रंगशालामा जारी प्रतियोगितामा प्रदेश एकका ८वटा नगरपालिकाका टिम सहभागी छन् । प्रतियोगिताको बिजेता टिमले २ लाख उपबिजेताले १ लाख पुरस्कार पाउने छन । चैत्र २१ गतेसम्म चल्ने प्रतियोगितामा २५ लाख अनुमानित खर्च हुने बताइएको छ।
प्रतियोगिताको बिहिबार कांग्रेस महामन्त्री डा.शशांक कोइरालाले औपचारिक रुपमा उद्धघाटन गरेपनि बिहिबारको खेल समय अभावका कारण स्थगित भएपछी प्रतियोगिता शुक्रबारबाट शुरु भएको हो।