काठमाण्डौ / देशभक्त गणतान्त्रिक मोर्चाका संयोजक तथा नेकपा (क्रान्तिकारी माओवादी) का उपाध्यक्ष सिपी गजुरेलले वर्तमान सरकारका प्रवक्ता नै भ्रष्टाचार काण्डमा मुछिएको अवस्थाले सरकारीस्तरमा हुने गरेको भ्रष्टाचारको पटाक्षेप गरेको बताउनुभएको छ।
आइतबार रिपोर्टर्स क्लब नेपालले राजधानीमा आयोजना गरेको साक्षात्कारमा गोकुलप्रसाद बाँस्कोटालाई राजीनामा मात्रै गराउनु पर्याप्त नभएको जिकिर गर्नुभयो। उहाँले भन्नुभयो, ‘यदि स्वीस कम्पनीसँग अन्तरविरोध नभएको भए ठूलो मात्रामा भ्रष्टाचार हुन लागेको रैछ नि, २६ अर्बमा हुने कुरा लागत बढाएर ४० अर्ब पुर्याईएको रहेछ, यत्रो ठूलो रकम खाने योजना रहेछ।’
मन्त्री बाँस्कोटाले ७ वटा योजनामा एक खर्ब खाने योजना बनाएको तथ्य पनि मिडियामा आएको उल्लेख गर्दै गजुरेलले भन्नुभयो, ‘अनि हामीले देश विकास होला भनेर कसरी कल्पना गर्ने ?’ सरकारले ‘समृद्ध नेपाल, सुखी नेपाली’ को नारा दिएर बकवास गरिरहेको उहाँको भनाइ छ। अहिले सामान्य नागरिकले आफ्ना छोराछोरी पढाउन तथा उपचार गराउन सक्ने अवस्था नभएको उल्लेख गर्दै उहाँले भन्नुभयो, ‘सरकारका मन्त्री नै यसरी भ्रष्टाचारमा लिप्त भएपछि मुलुकको यो अवस्था हुनु त सामान्य नै भयो नि।’
उहाँले तत्कालीन सञ्चारमन्त्री बाँस्कोटाको कमिशनको अडियो प्रकरणबारे गम्भिर छानबिन हुनुपर्ने बताउनुभयो। सो प्रकरणको नैतिक जिम्मा प्रधानमन्त्री केपी शर्मा ओलीले पनि लिनुपर्ने उहाँले प्रष्ट पार्नुभयो। उहाँले भने, ‘प्रधानमन्त्रीको जानकारीबिना यो सम्भव छैन।’
गजुरेलले सो अडियो दुई महिना पहिले नै प्रधानमन्त्रीकहाँ पुगेको कुरा आएको टिप्पणी गर्दै प्रश्न गर्नुभयो, ‘उहाँले यत्रो दिन किन गुपचुप राख्नुभयो ?’ यसले पनि यो प्रकरणमा प्रधानमन्त्रीको पनि कुनै न कुनै रुपमा संलग्नता देखिने उहाँको भनाइ थियो। ‘अख्तियारले सत्यतथ्य छानबिन गर्ने कुरामा विश्वास छैन,’ उहाँले भन्नुभयो, ‘अख्तियार त सरकारले जे भन्यो त्यही गर्छ।’ उहाँले यो प्रकरणमा अख्तियारलाई छानबिन गर्न दिएर कतै बाँस्कोटालाई जोगाउन चलखेल भइरहेको त छैन भन्ने आशङ्कासमेत उहाँले व्यक्त गर्नुभयो।
