मोरङ / मोरङको सुन्दरहरैंचा ७ गछिया बजारमा भ्वाइस अफ नेपालको टीमले सोमबार साँझ सांगीतिक प्रस्तुती दिएका छन्। गछिया बजारमा लागुपदार्थ दुव्र्यसनी विरुद्धको अभियानको सहयोगार्थ भ्वाइस लाइभ कन्सर्ट गरिएको हो।
सुन्दरहरैंचा एकता युव क्लवको आयोजनामा भएको कन्सर्टमा भर्खरै सम्पन्न भएको सांगीतिक रियालीटी सो भ्वाइस अफ नेपालका विजेता तथा प्रतिस्पर्धिहरुले सांगीतिक प्रस्तुती दिएका थिए।
कन्सर्टमा भ्वाइस अफ नेपालका विजेता राम लिम्बू, सनिस श्रेष्ठ, आरिफ राव, विकास लिम्बू, यांकी याल्मो र अञ्जु रानामगरले संगीतिक प्रस्तुती दिएर हजारौं दर्शकलाई झुमाएका थिए। यस्तै भ्वाइस अफ नेपालकै प्रस्तोता सुशील नेपालले होस्ट गरेका थिए।
सुन्दरहरैंचा नगरपालिका भरिका विद्यालयमा गएर लागुपदार्थ दुव्र्यसनी विरुद्ध सचेतना जगाउनका लागि आर्थिक सहयोग जुटाउने उद्देश्यले कन्सर्ट गरिएको सुन्दरहरैंचा एकता युवा क्लवका निश्चल घिमिरेले जानकारी दिनुभयो।
सुन्दरहरैंचा नगरपालिकाका प्रमुख शिवप्रसाद ढकालले उद्घाटन गरेको कन्सर्टमा सुन्दरहरैंचा नगरपालिकासहित स्थानीय व्यवसायी तथा समाजसेवीहरुले आर्थिक सहयोग गरेका थिए।
